1ܫܸܡܥܘܿܢ ܦܵܛܪܘܿܣ؛ ܪܹܓܵܐ ܘܫܠܝܼܚܵܐ ܕܝܼܫܘܿܥ ܡܫܝܼܚܵܐ؛ ܠܐܵܢܝܼ ܕܩܘܼܒܸܠܗܘܿܢ ܠܗܲܝܡܵܢܘܼܬܵܐ ܡܵܪܹܐ ܛܝܼܡܵܐ ܗܲܪ ܐܲܝܟܼ ܕܥܲܡܲܢ ܒܙܲܕܝܼܩܘܼܬܵܐ ܕܐܲܠܵܗܲܢ ܘܦܵܪܘܿܩܲܢ ܝܼܫܘܿܥ ܡܫܝܼܚܵܐ؛ 2ܫܵܦܵܩܲܬ ܘܫܠܵܡܵܐ ܙܵܝܸܕ ܐܸܠܵܘܟܼܘܿܢ ܒܝܕܹܥܬܵܐ ܕܐܲܠܵܗܵܐ ܘܕܝܼܫܘܿܥ ܡܵܪܲܢ؛ 3ܒܗ̇ܝ ܕܚܲܝܠܹܗ ܐܲܠܵܗܵܝܵܐ ܝܘܼܗَܒܼܸܠܹܗ ܐܸܠܲܢ ܟܠܵܝܗܝ ܡܸܢܕܝܼܵܢܹ̈ܐ؛ ܐܵܢܝܼ ܕܝܼܢܵܐ ܕܚܲܝܹ̈ܐ ܘܕܸܚܠܲܬ ܐܲܠܵܗܵܐ؛ ܒܝܼܲܕ ܝܕܸܥܬܵܐ ܕܗ̇ܘ ܕܩܸܪܝܵܝܠܹܗ ܒܬܸܫܒܘܿܚܬܵܐ ܘܛܵܒܼܬܵܐ ܕܓܵܢܹܗ؛ 4ܕܒܐܝܼܕ̈ܵܝܗܝ ܩܵܘܠܹ̈ܐ ܓܘܼܪܹ̈ܐ ܘܡܵܪܹ̈ܐ ܛܝܼܡܵܐ ܐܸܠܲܢ ܦܝܵܫܵܐ ܝ݇ܢܵܐ ܝܘܼܗ݇ܒܼܹܐ؛ ܕܒܝܼܲܕ ܐܲܢܹܐ ܗܵܘܹܝܬܘܿܢ ܫܲܪ̈ܝܼܟܹܐ ܕܐܲܨܠܵܐ ܐܲܠܵܗܵܝܵܐ؛ ܟܲܕ ܚܠܸܨܠܵܘܟܼܘܿܢ ܡ̣ܢ ܚܪܵܒܼܵܐ ܕܼܫܲܗ݇ܘܲܬܬܵܐ ܕܒܥܵܠܡܵܐ؛ 5ܘܗܲܪ ܒܐܵܗܵܐ ܣܵܒܵܒ؛ ܟܲܕ ܟܠܵܗ̇ ܡܲܣܲܡܬܵܐ ܕܒܵܠܵܐ ܒܸܥܒܼܵܕܵܐ ܝܬܘܿܢ؛ ܡܲܙܝܸܕܘܿܢ ܥܲܠ ܗܲܝܡܵܢܘܼܬܵܘܟܼܘܿܢ ܛܵܒܼܬܵܐ؛ ܘܥܲܠ ܛܵܒܼܬܵܐ ܝܕܹܥܬܵܐ؛ 6ܘܥܲܠ ܝܕܹܥܬܵܐ ܕܒܼܵܩܬܵܐ ܕܓܵܢܵܐ؛ ܘܥܲܠ ܕܒܼܵܩܬܵܐ ܕܓܵܢܵܐ ܚܡܵܠܬܵܐ؛ ܘܥܲܠ ܚܡܵܠܬܵܐ ܕܸܚܠܲܬ ܐܲܠܵܗܵܐ؛ 7ܘܥܲܠ ܕܸܚܠܲܬ ܐܲܠܵܗܵܐ ܡܲܚܲܒܬܵܐ ܕܐܵܚܘܿܢܘܼܬܵܐ؛ ܘܥܲܠ ܡܲܚܲܒܬܵܐ ܕܐܵܚܘܿܢܘܼܬܵܐ ܚܘܼܒܵܐ. 8ܣܵܒܵܒ ܐܲܢܹܐ ܟܲܕ ܗܵܘܝܼ ܒܝܼܵܘܟܼܘܿܢ؛ ܘܙܵܝܕܝܼ؛ ܒܸܬ ܡܲܩܸܡܝܼ ܠܵܘܟܼܘܿܢ ܠܵܐ ܒܵܛܝܼܠܹ̈ܐ؛ ܐܘܼܦ ܠܵܐ ܕܠܵܐ ܛܥܘܼܢܝܵܬܹ̈ܐ؛ ܠܝܕܹܥܬܵܐ ܕܡܵܪܲܢ ܝܼܫܘܿܥ ܡܫܝܼܚܵܐ. 9ܣܵܒܵܒ ܗ̇ܘ ܕܠܹܐ ܝ݇ܢܵܐ ܡܫ݇ܟ̰ܵܚܵܐ ܒܝܼܹܗ ܐܲܢܹܐ؛ ܣܸܡܝܵܐ ܝ݇ܠܹܗ؛ ܘܫܲܒܼܟܘܼܪ؛ ܘܢܫܹܠܹܐ ܕܵܟܼܵܝܬܵܐ ܕܡ̣ܢ ܚܛܝܼܵܬ̈ܘܼܗܝ ܩܵܕ݇ܡܵܝܹ̈ܐ. 10ܣܵܒܵܒ ܕܐܵܗܵܐ ܒܘܼܫ ܙܵܘܕܵܐ؛ ܐܵܚܘܿܢܘܵܬ̈ܝܼ؛ ܐ݇ܟܼܘܿܠܗ݇ܘܿܢ ܚܲܡ ܕܩܪܵܝܬܵܘܟܼܘܿܢ ܘܓܵܒܵܝܬܵܘܟܼܘܿܢ ܡܲܩܘܹܝܬܘܿܢ؛ ܣܵܒܵܒ ܕܟܲܕ ܐܲܢܹܐ ܥܵܒܼܕܝܼܬܘܿܢ؛ ܗܲܪ ܠܹܐ ܓ̰ܵܪܛܝܼܬܘܿܢ. 11ܣܵܒܵܒ ܗܲܕܟܼܵܐ ܒܕܵܘܠܲܬܡܲܢܕܘܼܬܵܐ ܒܸܬ ܦܵܝܫܵܐ ܝܸܗ݇ܒܼܸܠܬܵܐ ܐܸܠܵܘܟܼܘܿܢ ܥܒܼܵܪܬܵܐ ܠܡܲܠܟܘܼܬܵܐ ܕܠܥܵܠܲܡ ܕܡܵܪܲܢ ܘܦܵܪܘܿܩܲܢ ܝܼܫܘܿܥ ܡܫܝܼܚܵܐ. 12ܒܘܼܬ ܕܐܵܗܵܐ ܠܹܐ ܫܵܠܸܢ ܡ̣ܢ ܕܡܲܕܟܼܸܪܸܢܵܘܟܼܘܿܢ ܒܕܵܝܸܡܘܼܬܵܐ ܥܲܠ ܕܐܲܢܹܐ؛ ܐܵܦܸܢ ܕܨܦܵܝܝܼ ܟܹܐ ܝܵܕܥܝܼܬܘܿܢ (ܠܗ݇ܘܿܢ)؛ ܘܣܢܝܼܕܹܐ ܝ݇ܬܘܿܢ ܥܲܠ ܕܐܵܗܵܐ ܣܲܪܲܣܬܘܼܬܵܐ ܕܝܼܠܵܗ̇ ܠܟܸܣܠܵܘܟܼܘܿܢ. 13ܐܝܼܢܵܐ ܒܸܚܫܵܒܼܵܐ ܝ݇ܘܸܢ ܕܗܲܩ ܝ݇ܠܵܗ̇؛ ܟܡܵܐ ܕܝܼܘܸܢ ܒܐܵܗܵܐ ܡܲܫܟܢܵܐ؛ ܕܡܲܪܥܸܫܢܵܘܟܼܘܿܢ ܒܕܟܼܵܪܬܵܐ؛ 14ܟܲܕ ܒܝܼܕܵܥܝܵܐ ܝ݇ܘܸܢ ܕܫܵܠܲܚܬܵܐ ܕܡܲܫܟܢܝܼ ܓ̰ܲܠܕܹܐ ܒܸܬ ܗܵܘܝܵܐ؛ ܕܵܐܟܼܝܼ ܕܐܘܼܦ ܡܵܪܲܢ ܝܼܫܘܿܥ ܡܫܝܼܚܵܐ ܡܘܼܕܥܸܝܸܢܹܗ. 15ܐܝܼܢܵܐ ܒܹܐܟܼܵܠܵܐ ܝ݇ܘܸܢ ܚܲܡ ܕܒܕܵܝܸܡܘܼܬܵܐ ܗܵܘܹܐ ܠܵܘܟܼܘܿܢ ܡܒܵܬ݇ܪ ܦܠܵܛܵܐ ܕܝܼܝܼ؛ ܠܸܥܒܼܵܕܵܐ ܕܟܼܵܪܬܵܐ ܕܐܲܢܹܐ. 16ܣܵܒܵܒ ܠܵܐ ܒܵܬ݇ܪ ܡܵܣܵܠܹ̈ܐ ܕܥܒܼܝܼܕܹܐ ܒܐܘܼܡܵܢܘܼܬܵܐ ܐ݇ܙܸܠܲܢ؛ ܟܲܕ ܡܘܼܕܸܥܠܲܢ ܐܸܠܵܘܟܼܘܿܢ ܚܲܝܠܹܗ ܘܐ݇ܬܵܝܬܹܗ. ܕܡܵܪܲܢ ܝܼܫܘܿܥ ܡܫܝܼܚܵܐ؛ ܐܵܠܵܐ ܟܲܕ ܚܵܙܝܵܢܹ̈ܐ ܝ݇ܘܵܚ ܗَܘܵܘ ܕܓܘܼܪܘܼܬܵܐ ܕܝܼܹܗ. 17ܣܵܒܵܒ ܫܩܸܠܹܗ ܡ̣ܢ ܐܲܠܵܗܵܐ ܒܵܒܵܐ ܐܝܼܩܵܪܵܐ ܘܬܸܫܒܘܿܚܬܵܐ؛ ܟܲܕ ܩܵܠܵܐ ܐ݇ܬܹܐܠܹܗ ܐܸܠܹܗ ܐܲܝܟܼ ܕܐܵܗܵܐ ܡ̣ܢ ܬܸܫܒܘܿܚܬܵܐ ܙܲܪܝܼܦ ܒܓܘܼܪܘܼܬܵܐ؛ ܐܵܗܵܐ ܝ݇ܠܹܗ ܒܪܘܿܢܝܼ ܡܘܼܚܸܒܵܐ؛ ܗ̇ܘ ܕܒܝܼܹܗ ܒܸܒܣܵܡܝܼ ܝ݇ܠܵܗ̇. 18ܐܘܼܦ ܐܲܚܢܲܢ ܗܲܪ ܠܐܵܗܵܐ ܩܵܠܵܐ ܫܡܸܥܠܲܢ ܡ̣ܢ ܫܡܲܝܵܐ ܐ݇ܬܹܐܠܹܗ ܐܸܠܹܗ؛ ܟܲܕ ܥܲܡܹܗ ܝ݇ܘܵܚ ܗَܘܵܘ ܒܛܘܼܪܵܐ ܩܲܕܝܼܫܵܐ. 19ܘܐܝܼܬ ܠܲܢ ܐܘܼܦ ܗܹܡܸܙܡܵܢ ܒܘܼܫ ܩܘܝܼܬܵܐ ܕܢܒܼܝܼܘܼܬܵܐ؛ ܗ̇ܝ ܕܨܦܵܝܝܼ ܒܸܥܒܼܵܕܵܐ ܝ݇ܬܘܿܢ ܟܲܕ ܒܝܼܵܗ̇ ܒܸܚܝܵܪܵܐ ܝ݇ܬܘܿܢ؛ ܐܲܝܟܼ ܕܒܸܫܪܵܝܵܐ ܕܒܲܗ݇ܪܸܢܵܐ ܒܕܘܼܟܵܐ ܚܘܼܒܼܝܵܢܬܵܐ؛ ܗܲܠ ܕܐܝܼܡܵܡܵܐ ܒܲܗܪܸܢ؛ ܕܟܵܘܟܼܒܼܵܐ ܕܨܲܦܪܵܐ ܙܵܪܸܩ ܒܠܸܒܵܘܵܬܵܘ̈ܟܼܘܿܢ. 20ܟܲܕ ܐܵܗܵܐ ܩܵܕ݇ܡܵܝܬܵܐ ܝܵܕܥܝܼܬܘܿܢ؛ ܕܟܠ ܢܒܼܝܼܘܼܬܵܐ ܕܟܬܵܒܼܵܐ ܦܘܼܫܵܩܵܐ ܕܓܵܢܘܼܗ̇ ܠܹܐ ܗܵܘܹܐ ܠܵܗ̇. 21ܣܵܒܵܒ ܡ̣ܢ ܩܵܕ݇ܡܵܝܬܵܐ ܠܵܐ ܐ݇ܬܹܐܠܵܗ̇ ܢܒܼܝܼܘܼܬܵܐ ܒܪܸܙܵܝܵܐ ܕܒܲܪܢܵܫܵܐ. ܐܸܠܵܐ ܟܲܕ ܚܘܼܒܛܹܐ ܒܪܘܼܚܵܐ ܐ݇ܢܵܫܹ̈ܐ ܗܘܼܡܙܸܡܠܗ݇ܘܿܢ ܡ̣ܢ ܐܲܠܵܗܵܐ.